សៀមរាប៖ ពលរដ្ឋជាច្រើនអ្នកដែលបានចូលព្រមផ្លាស់ប្ដូរទីលំនៅទៅរស់នៅភូមិរុនតាឯក ក្នុងស្រុកបន្ទាយស្រី ខេត្តសៀមរាប បានសំដែងនូវការត្រេកអរក្រោយពីនាយករដ្ឋមន្ត្រីកម្ពុជា សម្ដេចតេជោ ហ៊ុន សែន សម្រេចផ្លាស់ប្ដូរការកំណត់ទីតាំងដែលពួកគេត្រូវទៅរស់នៅពីតំបន់ជនបទក្លាយជាទីប្រជុំជនដែលធ្វើឲ្យពួកគេទទួលបានការឧបត្ថម្ភសម្រាប់ប័ណ្ឌក្រីក្រកម្រិត១ កាន់តែច្រើនជាងមុន។

ការសម្រេចនេះបានធ្វើឱ្យគ្រួសារខ្លះទទួលបានប្រាក់ឧបត្ថម្ភជិត ៥០ម៉ឺនរៀលក្នុងមួយខែ និងអាចមានលើសពីនេះទៀត។

កាលពីយប់ថ្ងៃទី៨ ខែតុលា នាយករដ្ឋមន្ត្រី សម្តេចតេជោ ហ៊ុន សែន បានបញ្ជាទាំងយប់ឲ្យរដ្ឋមន្ត្រីសង្គមកិច្ចប្រញាប់បើកផ្ដល់សាច់ប្រាក់ឧបត្ថម្ភដល់ពលរដ្ឋដែលយល់ព្រមផ្លាស់ទីលំនៅតាមការកំណត់របស់រាជរដ្ឋាភិបាលដោយកំណត់ជាពលរដ្ឋក្រីក្រកម្រិត១ រស់នៅ «ទីប្រជុំជន» ដែលទទួលបានប្រាក់ឧបត្ថម្ភខ្ពស់ជាងពលរដ្ឋក្រីក្រកំរិត១ រស់នៅទីជនបទ។

អត្រាឧបត្ថម្ភនៅក្នុងទីប្រជុំជនសម្រាប់គ្រួសារក្រីក្រកម្រិត១ មានតម្លៃ ១២ម៉ឺនរៀលក្នុង១ខែ នឹងមានបូកបន្ថែមទៅតាមទំហំសមាជិកគ្រួសារដែលមាន ៤ម៉ឺនរៀលក្នុងម្នាក់ ៤ម៉ឺនរៀលសម្រាប់កុមារអាយុពី ០-៥ឆ្នាំ ក្នុងម្នាក់ ៤ម៉ឺនរៀលសម្រាប់ជនមានពិការភាពក្នុងម្នាក់ ៤ម៉ឺនរៀលសម្រាប់មនុស្សចាស់ចាប់ពី ៦០ឆ្នាំឡើងទៅ និង៤ម៉ឺនរៀលសម្រាប់គ្រួសារមានអ្នកផ្ទុកមេរោគអេដស៍៕